مسلمانوں پرظلم نہیں ہونےدینگے:جسٹن ٹروڈو

ویب ڈیسک — کینیڈین وزیراعظم جسٹن ٹروڈو نے اس بات کا اعادہ کیا ہے کہ کینیڈا میں اسلامو فوبیا کے لیے کوئی جگہ نہیں ہےاوریہ کہ وہ اپنے ملک کو مسلمانوں کے لیے پرامن جگہ بنانے کے عزم کا اظہارکرتے ہیں۔

ٹروڈو نےاپنےٹویٹراکاونٹ پرلکھا: "اسلامو فوبیا ناقابل قبول ہے۔ فل سٹاپ۔ ہمیں اس نفرت کو ختم کرنے اور مسلم کینیڈینز کے لیے اپنی کمیونٹیز کو محفوظ بنانے کی ضرورت ہے۔ اس سلسلےمیں مددکرنےاورہم اسلامو فوبیا سے نمٹنے کے لیے ایک خصوصی نمائندہ مقرر کرنے کا ارادہ رکھتے ہیں۔

ہفتے کے روزکینیڈا کے ہاؤسنگ، تنوع اورشمولیت کے وزیر احمد حسین نے حکومت کی انسداد نسل پرستی کی حکمت عملی کی وضاحت کی اوراسلامو فوبیا سے نمٹنے کے لیے ایک خصوصی نمائندہ مقرر کرنے کے وفاقی حکومت کے ارادے پر روشنی ڈالی۔ انہوں نے کہا: یہ تقرری کینیڈا کی حکومت کی نسل پرستی کے خلاف نئی حکمت عملی کا حصہ ہوگی۔”

پچھلے سال، کینیڈا کی حکومت نے 29 جنوری کو کیوبیک سٹی کی مسجد پر حملے اور اسلامو فوبیا کے خلاف کارروائی کی یاد کا قومی دن بنانے کے اپنے ارادے کا اعلان کیا تھا۔

حکومت کینیڈاکی طرف سےجاری ایک بیان میں کہاگیاہےکہ اس سال، دہشت گردی کے اس عمل کی پانچ سالہ سالگرہ کے موقع پرکینیڈا کی حکومت پورے کینیڈا میں مسلم کمیونٹیز کے ساتھ کھڑی ہے اور ان کی حمایت کرتی ہے اور اسلامو فوبیا اور نفرت کو ہوا دینے والے تشدد کی مذمت اور اس سے نمٹنے کے لیے کارروائی کرنے کے اپنے عزم کا اعادہ کرتی ہے۔

سرکاری بیان میں مزید کہا گیا ہے کہ اسلامو فوبیا کینیڈا اور دنیا بھر کی مسلم کمیونٹیز کے لیے ایک ٹھوس اور روزمرہ کی حقیقت ہے، انہوں نے مزید کہا کہ ہم متاثرین کی عزت کرتے ہیں، ہمیں یاد رکھنا چاہیے کہ ہماری ذمہ داری ہے کہ ہم امتیازی سلوک کا مقابلہ کریں۔

بیان میں کہا گیا کہ اسلامو فوبیا سے نمٹنے کے لیے خصوصی نمائندے کے کردار اور مینڈیٹ کے بارے میں تفصیلات کی تصدیق بعد میں کی جائے گی۔